يعني إيه بريد إلكتروني Email؟؟
زمان كان الناس سوا أفراد أو شركات بيبعتوا لبعض جوابات
الجواب عبارة عن .. ظرف جواه ورق الرسالة
الظرف او المظروف لو حابين نتكلم صح .. بيكون عليه من برة
اسم الراسل
عنوان الراسل اللي هو ساكن فيه .. انهي دولة في انهي مدينة في انهي شارع في انهي شقة وكدا
وفي الناحية التانية
اسم المرسل إليه
وعنوان المرسل إليه اللي هو بردة العنوان الجغرافي اللي ساكن فيه
وفي الورق اللي جوة بيكتب نص الرسالة بتاعته . وبعدين بنروح مكتب البريد ونحط طابع البوسطة ونيجي حاطين الجواب في صندوق البريد…
كان الجواب بياخد أيام واحيانا شهور على ما يوصل لصاحبه المبعوت… وكانت نار الشوق بتزيد ولا يطفيها إلا جواب من المحبوب.
واتطورت الدنيا .. وجه حد جميل بتاع نت وقال الله .. ما احنا ممكن نبعت نفس الجوابات على النت وتوصل في نفس اللحظة ,,, احنا ايه اللي يخلينا نستنى أيام وشهور … مش احنا عندنا مواقع الكترونية websites بتقدم خدمات مختلفة .. طيب ما نضيف اليها خدمة البريد .. وبدل ما الواحد يكون عنوانه على شقته .. لا .. يبقى عنوانه على الموقع الالكتروني
مثلا عبد الرحمن عايز يكون له عنوان على النت يبعت ويستقبل من خلاله الجوابات .. ييجي رايح أي موقع بيقدم الخدمة دي ويعمل عنوان عليه زي هوت ميل دو كوم مثلا
عبد الرحمن اسلام له عنوان على موقع هوت ميل دوت كوم
يتكتب كدة … abdelrahmaneslam@hotmail.com
3 مقاطع
Abdelrahmaneslam .. اسم صاحب البريد
@ يعني .. على او في
hotmail.com : اسم الموقع اللي بيقدم خدمة البريد
وبيتقري كدة عبد الرحمن .. ات يعني حاجو على او في .. هوت ميل دوت كوم
والعنوان اللي ينحجز ما يتكررش لاي حد تاني خالص
ومافيش أي مسافات بين الحروف
ونجحت الفكرة .. وكترت المواقع الللي بتقدم الخدمة دي .. واشهرهم على الاطلاق جي ميل و ياهوو واوت لوك او هوت ميل
فالواحد لما يروح أي موقع بيقدم خدمة البريد ويحجز لنفسه عنوان .. هو في الحقيقة بيحجز حاجتين اتنين
- عنوان خاص به لوحده غير قابل للتكرار اطلاقا على نفس الموقع
- مساحة صندوق البريد .. ودي معناها انت تقدر تستقبل كمية قد ايه من الرسايل على العنوان ده .. جي ميل محددة مساحة لو رسايلك زادت عنها بتضطر انك تدفع كل سنة 60 دولار على الأقل
وعشان البريد ده معمول على موقع الكتروني فسموه بريد إلكتروني .. او electronic mail اللي اختصروها إلى Email
طيب عشان ابدا في ارسال واستقبال وتصفح البريد الالكتروني او ال email بتاعي اعمل ايه ؟؟
في الحقيقة محتاج متصفح للبريد ,, وده يا اما يكون
- الموقع نفسه اللي انت عامل البريد بتاعك عليه
- موقع تاني بيقدم الخدمة دي
- برنامج على الكمبيوتر زي ( اوت لوك – ثاندر بيرد وغيرهم
- تطبيق على الموبايل وده غالبا بيكون جاي مع الموبايل زي جي ميل او ايميل او اوت لوك او غيرهم
وعشان تحتفظ بخصوصية بريدك وما حدش يقدر يشوفها فبيكون معاك كلمة مرور او باسورد بتدخلها وقت ما تحتاج اليها.
